काठमाडौ, २२ भदौ, एकीकृत नेकपा माओवादीका
अध्यक्ष पुष्पकमल दाहाल ‘प्रचण्ड’ले आफ्नो पार्टीको
मधेस राष्ट्रिय मुक्ति मोर्चालाई आन्दोलनबाट
फिर्ता भएर संविधान निर्माण प्रक्रियाको पक्षमा
वातावरण बनाउन निर्देशन दिएका छन् । तराईमा
भइरहेको आन्दोलन मधेसका लागि नभई गणतन्त्र र
धर्मनिरपेक्षतालाई नै धरापमा पार्ने खालको रहेको
भन्दै प्रचण्डले आफ्ना मधेसी नेताहरुलाई आन्दोलनको
मैदानबाट फिर्ता बोलाएका हुन् ।
हिजो प्रचण्डले मोर्चाका संयोजक रामकुमार
शर्मालगायत रामचन्द्र झा, विश्वनाथ साह लगायत
तराईबाट प्रतिनिधित्व गर्ने नेताहरुलाई निवासमै
बोलाएर यस्तो निर्देशन दिएका हुन् । ‘यो
संविधानमा मलाई पनि कतिपय चित्त नबुझेका विषय
छन् । हाम्रो पार्टीले फरक मत पनि राखिसकेको छ ।
तर, अहिलेको शक्ति समीकरणबाट आउने संविधान यस्तै
हो,’ प्रचण्डलाई उद्धृत गर्दै एक मधेसी नेताले भने,
‘यसबारे म संविधानसभामा पनि बोल्छु । त्यसबाट
पनि वास्तविकता थाहा हुन्छ । त्यसपछि चित्त बुझेन
भने आन्दोलन गर्ने वा के गर्ने, सल्लाहमा गरौँला ।’
मधेसी नेताहरुले अहिलेको मधेस आन्दोलनमा सामेल भएन
भने आफ्नो पार्टी मधेसबाट बढारिन सक्ने खतरा
औँल्याएका थिए । जवाफमा प्रचण्डले भने, ‘यस्तो
संकटको घडीमा पार्टीभन्दा देश जोगाउने कुरा ठूलो
। देश रहे त पार्टी पुनःनिर्माण पनि गर्न सकिन्छ ।’
प्रचण्डले देश रहने र नरहने कुरा गरेपछि मधेसी नेताहरु
पनि गम्भीर बनेका थिए । प्रचण्डले थप अगाडि भने,
‘गणतन्त्र र धर्मनिरपेक्षता नै संकटमा पर्ने गरी
अन्तर्राष्ट्रिय दबाब आइरहेको छ । गणतन्त्रलाई नै
धरापमा पार्ने गरी आन्दोलनमा जानुहुँदैन । अहिले
मधेसका कतिपय आन्दोलनकारी मधेसका लागि होइन,
गणतन्त्र र धर्मनिरपेक्षतालाई डिफ्युज गर्नलाई
भइरहेको छ ।’
मधेसी नेताहरुले थारुको माग सम्बोधन भए पूर्वतिरको
आन्दोलन त्यसै सकिने र आफूहरुले पनि आन्दोलन फिर्ता
लिन सकिने बताएका थिए । जवाफमा प्रचण्डले भने,
‘अझै पनि समय छ । हामी सकेसम्म कसरी धेरैको चित्त
बुझाउन सकिन्छ भनेर लागिरहेकै छौँ । थारुको माग
सम्बोधन गर्ने विभिन्न विकल्पहरुमा छलफल भइरहेको छ
। थारु आयोग बन्नु पनि अहिलेलाई ठूलो उपलब्धि हो
।’
हिजै मोर्चाको बैठक बसेको थियो । बैठक पनि
आन्दोलन फिर्ता लिने निष्कर्षमा पुगिसकेको
ओएनएसको सम्पर्कमा आएका मोर्चाका एक
पदाधिकारीले बताए । त्यसअघि मोर्चाका नेताहरुले
थारु नेता समेत सहभागी गराएर भेलामार्फत्
पार्टीबाटै राजीनामा गरेर आन्दोलनमा
जानेसम्मको तयारी गरेका थिए । आज थारु सांसद,
नेतालाई बोलाएर एमाओवादी नेतृत्वले छलफल गर्दैछ ।
प्रचण्डनिकट नेता हरिबोल गजुरेललगायतले
पार्टीभित्रका असन्तुष्ट मोर्चा र तिनका
नेताहरुलाई सम्झाउने र संविधान निर्माणको पक्षमा
सहमत गराउने भूमिका खेलिरहेका छन् । तर,
एमाओवादीकै नेता बाबुराम भट्टराई भने मधेसी,
जनजाति, दलित, महिला सबैले आन्दोलन गर्नुपर्ने र
उनीहरुको माग सम्बोधन नगरी संविधान जारी
गर्नुहुदैन भन्ने धारणा सामाजिक सञ्जालमार्फत्
सार्वजनिक गर्दै आएका छन् । हिजो मात्र उनले
फेसबुकमा लेखेका छन्, ‘सेनाको घेराबाट संविधान
जारी गर्नु उपयुक्त हुँदैन ।’
तर, प्रचण्ड पक्षीय नेताहरु भने वर्षमान र बाबुरामका
कारण पार्टीमा भाँडभैलो मच्चिन लागेको भन्दै
चिन्ता व्यक्त गरिरहेका छन् । केही दिनअघि गजुरेलले
आफ्नो फेसबुकमा लेखेका थिए, ‘संविधान निर्माणको
यो विन्दुमा क्रान्तिकारी बन्न सजिलो छ । अडान
लिन पनि सजिलो छ तर संविधान बनाउन गाह्रो छ
। तर, गाह्रो काम गर्ने सच्चा क्रान्तिकारी हुन्छ कि
अवसरवादी, गम्भीर बनौँ ।’
ओएनएस
0 comments:
Post a Comment