भिडियो हेर्न यहाँ तल क्लिक गर्नुहोस

काठमाडौं, २२ भदौ । जोरपाटीस्थित हेलम्बु
बसपार्कनजिकको एक रेस्टुरेन्टमा आइतबार
दिउँसो दुई समूहबीच झगडा भयो । मदिराको
नसामा रहेका तेन्जिङ शेर्पाले छेउको टेबुलमा
बसेका अन्यलाई हेप्न थालेपछि झगडा भएको
थियो ।
झगडाको क्रममा स्थानीयले उनीमाथि
कुटपिट गर्न थालेपछि उनले कम्मरमा लुकाएको
पेस्तोल निकालेर फायरिङ गरे । स्थानीयको
सहयोगमा तत्कालै प्रहरीले उनलाई नियन्त्रणमा
लिए ।
‘गोली चलाउने शेर्पा गुन्डागर्दीमा संलग्न
व्यक्ति भएको खुलेको छ,’ महानगरीय प्रहरी
वृत्त बौद्धका डिएसपी नरहरि रेग्मी भन्छन्,
‘गुन्डागर्दी गर्नकै लागि गत वर्ष भारतबाट ९०
हजारमा पेस्तोल किनेर ल्याएको रहेछ ।’
प्रहरीका अनुसार स्वयम्भू बस्ने शेर्पाले पेस्तोल
देखाएर धम्क्याएर राजधानीमा गुन्डागर्दी र
पैसा असुल्दै आएको नयाँ पत्रिका दैनिकले
छापेको छ ।
राजधानीका सबैजसो टोलमा शेर्पाजस्तै
गुन्डाहरू रहेको प्रहरीको भनाइ छ । उनीहरूलाई
प्रहरीले ‘टोलेगुन्डा’ भन्ने गरेको छ ।
टोलेगुन्डा सयौँको संख्यामा राजधानीमा
सक्रिय रहेको र धाकधम्की देखाएर असुली गर्दै
आएको प्रहरीले जनाएको छ ।
रेस्टुरेन्टहरूमा सित्तैमा खानेदेखि उनीहरूले धम्की
दिएर पैसा असुल्नेसम्म गर्छन् । आफ्नो टोलमा
गुन्डागर्दी गरेकै आरोपमा एक युवा हाल
महानगरीय प्रहरी वृत्त गौशालाको
हिरासतमा छन् ।
असिम भनिने निसान गुरुङले चाबहिल,
गौशाला, रातोपुल तथा कालोपुल क्षेत्रमा
धम्क्याउँदै आएका थिए । पछिल्लो समय सो
क्षेत्रमा काम गर्ने ठेकेदारहरूलाई धम्क्याएर उनले
पैसा असुलेको सूचनाका आधारमा पक्राउ
गरिएको गौशाला वृत्तका डिएसपी सुरेन्द्र
मैनालीले बताए ।
सो क्षेत्रमा गुरुङजस्ता अरू गुन्डा पनि धेरै रहेको
प्रहरीले जनाएको छ । गुन्डागर्दीकै भरमा पैसा
कमाउने कर्मा लामा पनि महानगरीय प्रहरी
वृत्त महाराजगन्जको हिरासतमा छन् । बाटो
हिँडिरहेका एक सर्वसाधारणलाई धम्क्याएर
उनले दुई लाख २० हजार रुपैयाँ लुटेका थिए ।
उनलाई प्रहरीले जबर्जस्ती चोरी मुद्दामा
कारबाही अघि बढाएको छ । गुन्डागर्दीमा
उनी टोली नै बनाएर हिँड्ने गरेको महाराजगन्ज
वृत्तका एक प्रहरीले बताए ।
जावलाखेलका फुटपाथ व्यापारीलाई
धम्क्याएर सित्तैमा सामान लिने सञ्जयसिंह
ठकुरीलाई पनि प्रहरीले पक्राउ गरी केही
सार्वजनिक अपराध मुद्दामा कारबाही अघि
बढाएको छ ।
राजधानीमा टोलेगुन्डाहरू पनि गुन्डागर्दीकै
एउटा भाग भएको महानगरीय प्रहरी अपराध
महाशाखाका प्रमुख एसएसपी सर्वेन्द्र खनालले
बताए । उनले त्यस्ता समूहविरुद्ध उजुरी गर्न
आग्रहसमेत गरे । ‘हामीले हरेक टोलमा
स्क्रिनिङको तयारी गरेका छौँ,’ उनले भने ।
लागुऔषध सेवन गर्ने, धम्क्याउने तथा
महिलामाथि दुव्र्यवहार गर्ने टोलेगुन्डाहरूको
समूहबाट राजधानीमा धेरै सर्वसाधारण
पीडित छन् ।
यस्ता समूह केहीले पेस्तोल नै बोक्छन् भने केहीले
छुरा बोकेर हिँड्ने गरेका छन् । ठूला गुन्डाहरूसँग
मिलेर बालुवाको ठेक्का हात पार्नेलगायत
धन्दामा समेत उनीहरू संलग्न छन् ।
प्रहरीले कडा नीति लिएपछि ठूला गुन्डाहरूको
भागाभाग भए पनि टोलेगुन्डाहरू सक्रिय नै छन् ।
रेस्टुरेन्ट, कलेज, मेनपावर मात्र होइन, उनीहरूले
सामान्य पसलेलाई समेत धम्क्याउने गरेका छन् ।
उजुरी गर्दा पनि दुई–चार दिनमै छुट्ने र एउटै
टोलमा बस्नुपर्ने भएकाले असुरक्षाका कारण धेरैले
उजुरी दिँदैनन् । महानगरीय अपराध
महाशाखाका डिएसपी रमेश थापाले
टोलेगुन्डाहरूको विवरण संकलन गरी निगरानी
भइरहेको बताए ।
‘हामीले सूचना संकलनको काम गरिरहेका छौँ,’
डिएसपी थापाले भने, ‘ठूला, साना जोसुकै भए
पनि गुन्डागर्दी गर्नेविरुद्ध हामी कडा नीति
अपनाउँछौँ ।’
थापाका अनुसार यस्ता टोलेगुन्डाहरू
राजधानीमा डेढ सयदेखि दुई सयको संख्यामा
छन् । कलंकी, सामाखुसी, जोरपाटी,
काँडाधारी, कोटेश्वर, कपन, महराजगन्जजस्ता
क्षेत्रमा टोलेगुन्डा धेरै रहेको प्रहरी अधिकारी
बताउँछन् ।
त्यस्तै, ललितपुर र भक्तपुरमा पनि यस्ता समूह छन्
। ‘हरेक टोलमा भएकाले नै यिनीहरूलाई
टोलेगुन्डा भनिएको हो,’ एक प्रहरी अधिकारी
भन्छन्, ‘टोलटोलमा यस्ता समूह छन् ।’
पटक–पटक पक्राउ परेका ठूला गुन्डाहरू धम्क्याएर
असुल्नेभन्दा नेताहरूसँग मिलेर ठेक्कापट्टामा
लागेका छन् । केहीले आफूलाई ठूला गुन्डाहरूको
प्रतिनिधिको रूपमा प्रस्तुत गरेरसमेत धम्क्याउने
गरेका छन् ।
‘उनीहरूमा पेस्तोल बोकेर हिँड्ने सोख हुन्छ,’ एक
प्रहरी अधिकारी भन्छन्, ‘यिनीहरूलाई अहिले नै
सुधार्न सकिएन भने पछि खुँखार अपराधी भएर
निस्कन्छन् ।’
पक्राउ गरेपछि उनीहरूविरुद्ध प्रहरीले
सार्वजनिक अपराध मुद्दा मात्र चलाउन सक्छ ।
जसमा करिब तीन साता थुनिएर उनीहरू
सामान्य धरौटीमा नै छुट्ने गर्छन् ।
यस्ता व्यक्तिहरूलाई गुन्डागर्दी ऐनअन्तर्गत
कारबाही गर्न प्रहरीले ऐनको मस्यौदा तीन
वर्षअघि नै गृहमा बुझाएको छ । तर, अझै ऐन आउन
सकेको छैन ।